12 August 2017

'ಹಿಂದು' ಎಂದರೆ ಯಾರು?

ಭಾರತ ಜನಿಸಿದ್ದು ಸಿಂಧು ನದಿಯ ದಡದಲ್ಲಿ. ಪ್ರಾಚೀನ ಭಾರತದಲ್ಲಿ ಸಂಸ್ಕೃತ ಜ್ಞಾನದ ಭಾಷೆಯಾಗಿತ್ತು. ದಿನಬಳಕೆಗೆ ಸಂಸ್ಕೃತದ ಸರಳ ರೂಪವಾದ ಪ್ರಾಕೃತವನ್ನು ಬಳಸುತ್ತಿದ್ದರು. ಪ್ರಾಕೃತ ಶಬ್ದಗಳು ಸಂಸ್ಕೃತ ಶಬ್ದಗಳ ಸರಳ ರೂಪಗಳಾಗಿದ್ದವು (ಇಂದು ಹೇಗೆ ಕನ್ನಡ ಶಬ್ದಗಳು ಸಂಸ್ಕೃತ ಶಬ್ದಗಳ ಸರಳ ರೂಪಗಳೋ ಹಾಗೆಯೇ). ಅಂತೆಯೆ ಪ್ರಾಕೃತದಲ್ಲಿ ಸಂಸ್ಕೃತದ 'ಸಿಂಧು' ಶಬ್ದ 'ಹಿಂದು' ಎಂದು ಬದಲಾಯಿತು. 'ಹಿಂದು' ಶಬ್ದದ ಮೂಲ ಅರ್ಥ ಸಿಂಧು ನದಿ ಎಂದು. ನಂತರ ಅದಕ್ಕೆ ಇನ್ನೊಂದು ಅರ್ಥ ಬಂತು: ಯಾವ ಜನರ ನಾಗರಿಕತೆ ಸಿಂಧು ನದಿಯ ದಡದಲ್ಲಿ ಹುಟ್ಟಿತೋ, ಅವರು ಎಂದು.

ಈ ಹಿಂದುಗಳು ಹಿಮಾಲಯ ಮತ್ತು ಮಹಾಸಾಗರದ ಮಧ್ಯ ಇರುವ ಭೂಭಾಗದಲ್ಲಿ ವಾಸವಾದರು. ಅದಕ್ಕೆ ಈ ಭೂಭಾಗ 'ಹಿಂದುಸ್ಥಾನ' ಆಯಿತು. ಈ ದೇಶದಲ್ಲಿ 'ಭರತ' ಎಂಬ ಮಹಾರಾಜ ಇದ್ದ. ಅದಕ್ಕೆ ಈ ದೇಶಕ್ಕೆ 'ಭಾರತ' ಎಂಬ ಹೆಸರೂ ಬಂದಿತು. ಆದ್ದರಿಂದ 'ಹಿಂದು' ಮತ್ತು 'ಭಾರತೀಯ' (ಹಾಗೂ 'ಹಿಂದುಸ್ಥಾನ' ಮತ್ತು 'ಭಾರತ') - ಇವು ಸಮಾನಾರ್ಥಕ ಶಬ್ದಗಳು.

ಈ ಹಿಂದುಗಳು ಒಂದು ಜೀವನ ವಿಧಾನ ಅಥವಾ ಧರ್ಮವನ್ನು (ನಂಬಿಕೆಗಳು ಮತ್ತು ಆಚಾರಗಳು) ರಚಿಸಿದರು. ಅದು ಹಿಂದುಗಳ ಧರ್ಮವಾದ್ದರಿಂದ ಅದು 'ಹಿಂದು ಧರ್ಮ' ಆಯಿತು. ಅದಕ್ಕೆ ಇನ್ನೊಂದು ಹೆಸರು 'ಸನಾತನ ಧರ್ಮ' ಎಂದು. ಜತೆಗೆ, ಈ ಹಿಂದುಗಳು ಅನೇಕ ಮತಗಳನ್ನು (ದೇವರ ಪೂಜಾ ಪದ್ಧತಿ) ರಚಿಸಿದರು: ಶೈವ, ವೈಷ್ಣವ, ಶಾಕ್ತ, ಬೌದ್ಧ, ಜೈನ ಮತ್ತು ಸಿಖ್ ಎಂಬ ಮತಗಳು.

ಇದು 'ಹಿಂದು' ಶಬ್ದದ ನಿಜವಾದ ಅರ್ಥ. ಅದು ಒಂದು ಜನಾಂಗದ ಹೆಸರು. ಅದಕ್ಕೂ ಮತಕ್ಕೂ ಯಾವ ಸಂಬಂಧವೂ ಇಲ್ಲ. ಆದ್ದರಿಂದ: "ನಾವು ಹಿಂದು ಧರ್ಮವನ್ನು ಪಾಲಿಸುತ್ತೇವೆ, ಅದಕ್ಕೆ ನಾವು ಹಿಂದುಗಳು" - ಇದು ತಪ್ಪು. ಸತ್ಯ ಬೇರೆ: ನಾವು ಹಿಂದುಗಳು, ನಮ್ಮದೊಂದು ಧರ್ಮ ಇದೆ, ಅದು ಹಿಂದುಗಳ ಧರ್ಮವಾದ್ದರಿಂದ ಅದಕ್ಕೆ 'ಹಿಂದು ಧರ್ಮ' ಎಂದು ಹೆಸರು.

No comments: